تاج التدوين

تحديث

كل عام وأنتم جميعا بخير، أعاده الله عليكم جميعا وأنتم فى خير وصحة وسعادة

أرجو الا تنسوا زكاة الفطر وبر الوالدين وصلة الرحم

وصيام السته من شوال

وأن تعفوا عمن ظلمكم وتنسوا أية خصومة ولنجاهد أنفسنا لنفعلها لله

-------------------------------------------------------

يا جماعة أشهدكم انى لا أحب الإجابة على أسئلة التيجان و لا أجيد الإجابة عليها وانها المرة الأولى ويارب تكون الأخيرة اللى اشوف فيها كلمة تاج فى مدونتى

التاج وصلنى اولا من الباشمهندس مصرى صاحب مدونة يوميات ولد مصرى

ثم من طارق عميرة صاحب مدونة كوارث وأحد أبنائى الأعزاء فى عالم التدوين

بدأت تدون من امتى ؟ودخلت العالم ده ازاى ؟
فبراير 2008 . كنت سمعت عن مدونة غادة عبد العال عايزة اتجوز وعملت بحث على جوجل اشوف بتكتب ايه وظهر قدامى صفحة بتقولى اعمل مدونة فى 3 خطوات ومشيت مع الخطوات لقيت نفسى فجأة عندى صفحة قالوا عنها شبه النفق المظلم كانت زرقاء داكنة وكانت أول مدونة

ايه كان انطباعك في البداية ؟
أنا مكنتش فاهمه ايه اللى بيحصل بكتب وخلاص ومعرفش ايه حكاية التعليقات ولا اعرف ان ممكن الناس تدخل عندى وادخل عندهم يعنى كنت عبيطة جدااااا وأول تدويناتى برضه كانت كلام عبيط بس كنت فرحانة انى بكتب وخلاص لغاية ما ظهر أول تعليق على موضوع كتبته وتوالت الأحداث بعد كده يعنى تقدروا تقولوا انى كنت مندهشه ...مستغربة...مش فاهمه لانى لم أقصد أبدا الدخول لهذا العالم الذى ما زالت دهشتى منه مستمرة

ايه أهم حاجة اتعلمتها من عالم التدوين ؟
ياه حاجات كتير.
انه المهم انك تكون حاسس الكلام وساعتها الناس كمان بتحسه
انك مهم تبقى عارف ان الكلمة مسؤلية وربنا هيسألنا عنها
ان الكلمة الطيبة صدقة و ان ممكن جملة واحدة تغير فى حياة انسان لو فعلا خارجة من القلب
ان الدنيا اوسع مما كنت أتصور والناس متنوعة فى شخصياتها وتوجهاتها اكتر مما كنت أتصور
أنك أحيانا ممكن تتصور انك على حق وتكون الحقيقة مش كده وترفض تسمع للناس فمهم جداااا انك تدعى ربنا دايما
" اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه"

ان المدونة ممكن تكون زى ملامح الانسان بتدل عليه وغالبا ما
يتوافق محتوى المدونة مع شخصية المدون
انى بعد العمر دا كله لسه عبيطة وأحيانا
بحكم على الناس غلط
الدنيا بخير حقيقى والناس كل اللى محتاجاه انك تدلهم على
طريق الخير وساعتها مش هيتأخروا أبدا

ايه أكتر حاجة كرهتها ؟
المجاملات فى التعليقات بكرهها جداااااااا
الخلافات التى تخرج عن حدود مبدأ " وجادلهم بالتى هى أحسن"
استغلال التدوين فى محاربة الدين واكتشافى وجود شباب ملحدين ...الله يهديهم بجد

حاسس ان التدوين له تأثير ؟
إلى الآن له تأثير محدود لكن أعتقد ان التأثير ممكن مع الوقت يكون أكبر لأن التدوين نجح فى اخراج بعض من الأغلبية الصامته عن صمتها وبكرة تعلى الأصوات ويسمعها اللى مش عايزين يسمعوا
لكن الى الآن التأثير شخصى يعنى كل مدون اتأثر بالتدوين بالتأكيد واتغير بشكل او بأخر
واللى باتمناه ان روح العمل الجماعى تنتشر فى التدوين ونعمل خير أكتر وبالتالى يكون تأثيرنا على حياة الناس تأثير مباشر. حقيقى بعض الناس فى بلادنا بقت عاملة زى السمك الصغير كل الحيتان فاتحة بقها وعايزة تبلعها ودول اللى نفسى بجد يكون لنا تأثير على حياتهم لانهم محتاجين لنا ...محتاجين نحميهم ونساعدهم لغاية ما يقدروا يدافعوا عن حقوقهم أو على الأقل يعرفوا ان لهم حقوق فى البلد زيهم زى الحيتان بالضبط

تهدى التاج لمين ؟
كل زوار المدونة يهمنى أسمع اجاباتهم فتفضلوا بقبول التاج