إدعوا لمصر

• كل المغتربين فى مصر فى حالة حزن شديد وترقب لما يحدث فى بلدنا. معظم من قابلت يتابع الأخبار ساعة بساعه بل تجد من يتصل وهو فى الدوام ليطمئن على أخبار مصر وليس فينا من لم يتمنى ان يكون هناك مع المتظاهرين. أد ايه كلنا فخورين بشباب مصر وبكل ما اظهروه من رجولة وشهامه وشجاعه. ربنا يحميهم ويطمنا عليهم.


• حجب الانترنت يدل على العقلية المتحجرة الساذجة للنظام والتى تصورت ان هذا الإجراء سيخمد ثورة المصريين وهذا أكبر دليل على انهم لا يصلحون لتولى الأمور لأنهم من زمن أخر


• وزير الداخلية يجب أن يحاكم محاكمة عسكرية علنية ويجب أن يعرف الشعب كيف وصلت سطوته إلى هذه الدرجة...كيف حرك الشرطة ورجالها وكأنهم قطع من الشطرنج ...وهل لا توجد قيادات فى الداخلية تعارضه فى هذا القرار الذى ساهم فى التخريب والتدمير والقتل؟؟؟...يجب أن يحاكم هو و كل مسؤول معه وكل خائن لهذا الوطن


• ارجو من البرادعى ان يكف عن الحديث وكأنه المنقذ لمصر ...ارجوك ارحل انت الأخر


• إلى كل من استهان ومازال يستهين بالشعب المصرى...الرسالة واضحة والصورة تشرح عظمة هذا الشعب وقدرته وكفاية تقليل من شأن أنفسنا


• ربنا يسلم الجميع وينصرهم

شعبنا الصابر

كل مصرى فى الغربة فخور بشبابنا وبكل مشارك فى المظاهرات. شعبنا صبر كتير واتحمل كتير واللى بيحكمونا مش قادرين يفهموا ان الصبر له حدود وان الانسان ممكن يصبر على الحرمان من الكماليات لكن الاساسيات صعب قوى انه يصبر على حرمانها. الام اللى بتصحى الصبح وفى قلبها حسرة لانها متقدرش تقدم لابنها كباية لبن ولا بيضة لان سعرهم غالى ويخرج من البيت بنفس لبس المدرسة اللى عنده من سنتين ولا تلاته ويسألها ليه؟ . الأب اللى بيشتغل من الصبح لنص الليل علشان يوفر لبيته الاساسيات وفى النهاية كل ده من صحته ووقته ويبقى حاسس انه فى ساقية ويرجع بيته مش طايق نفسه ويسأل امال امتى هتمتع بصحبة ولادى واقدر اقعد مع زوجتى. الأولاد اللى بيشوفوا غيرهم منعمين مع ان شغلة الأباء واحدة ازاى يفهموا معنى الشرف ورفض المال الحرام والصبر على الحرمان.الشاب اللى اتعلم وخرج من الجامعة ولا لاقى شغل ولا جواز ولا حرية متبهدل فى كل مكان ومنتهى أمله انه يلاقى فرصه يخرج بره مصرلأن بلده بقت مش بتاعته وحاسس انه فى غربه يبقى هو كده كده متغرب....بلاد أقل مننا كتير بتحلم يكون عندها شباب زى شبابنا واحنا بنطفشهم.... ازاى نصبر على الفساد والرشوة وأخلاق الغابة اللى ابتدت تنتشروالإنتماء اللى ابتدى يبقى شعار مش واقع. ازاى منقولش كفاية احنا مش عايزين نبقى كده احنا عايزين نعيش بالحلال ..عايزين لما نتعب نلاقى ثمرة التعب عايزين مالنا...كفاية سرقة فى خير البلد...كفاية كتم انفاسنا...احنا مش عايزين نقلب نظام الحكم ....احنا عايزين نعدله...مصر تستاهل احسن من كده وناسها يستاهلوا أحسن من كده...عيش...حرية...ديمقراطية....تكافؤ فرص...مساواة...عدالة
للصبر حدود
ارحلوا .....وسيبوا مصر لأهلها الحقيقيين اللى بيخافوا عليها
سيبوها للشباب اللى ممكن يرجعها أم الدنيا تانى
ربنا يسلم ويرجع كل مشارك فى المظاهرات لأهله بالسلامة
ربنا يسلم وترجع مصر للمصريين