أفكار متطايره

• مش عارفه ليه غسل الأطباق بيمثل لى وقت للإسترخاء والتفكير..يمكن لأنه شىء لا يحتاج لتفكير
• مين هيحكم مصر بعد مبارك؟؟ سؤال سخيف لأنهم بالتعديل الدستورى حصروا الترشيح فى دائرة ضيفة وبالتالى احنا بنسأل سؤال اجابته تكاد تكون معروفه لكن أنا شخصيا أرفض جمال مبارك لأنه أخد فرصة لا تتوافر للأخرين لمجرد انه ابن الرئيس ..يعنى اذا أخذنا بالكفاءة بالتأكيد هناك من هو أصلح منه..وبصراحه أكتر يكفينا من عائلة مبارك واحد فقد أخذ من الوقت ما يكفى لعائلته لأجيال قادمه...كفاية
• الناس فى المدينة المنورة وفى الحرم النبوى لا يبدو عليهم أدنى اهتمام بموضوع انفلوانزا الخنازير...عايشين حياتهم عادى خالص وربنا يستر
• استقالة الوزير منصور أسعدتنى سواء كانت حقيقة أم انها إقالة ولعلها تكون بداية لاستقالات أخرى..
• صدمتنى إجابة الدكتور راغب السرجانى عن سؤال هل يمكن هدم الأقصى لاننى توقعت أن يقول أن هذا مستحيل عملا بمبدأ "للبيت رب يحميه" ولكنه يجيب بامكانية هدم المسجد ويجيب إجابة مقنعه جدا هو يقول نعم يمكن أن ينجح الصهاينة فى هدم الأقصى ويحذر من ننا جميعا رجال ونساء مسؤولون أمام الله عما يحدث هناك..يمكنكم قراءة المقال كاملا فى مدونة"مهندس مصرى بيحب مصر" وجزاهم الله خيرا..كاتب المقال وناشره
• بلدنا جميلة ..ده حقيقى ..لكن احنا فقدنا احساسنا بالجمال ...
• هل احنا شعب عنيف بطبعه ولا اللى بيعملوه فينا وفى بلدنا خلانا فقدنا هدوء الطبع والصبر وليه صوتنا عالى حتى واحنا فرحانين وليه مش بنقول اللى حاسينه وبنزوق الكلام ونقول دى مجاملة؟
• أنا تزوجت بدون فرح..مجرد كتب كتاب فى قاعة فى دار القرآن العظيم ووزعت شيكولاته وذهبنا لالتقاط بعض الصور وخلاص ..شىء بسيط جدا وبصراحة كنت مقتنعه جداا أنا وزوجى وسعداء ..وأنا بسأل يا ترى الناس قالت ايه وده من باب الفضول وليس من باب القلق وياريت كل انسان يعمل اللى هو مقتنع بيه ويكون سعيد وبلاش نعمل حساب الناس هيقولوا ايه لانهم فى كل الأحوال هيقولوا ..ليه الشباب يتأخر زواجه علشان منتظر يوفر تكاليف الفرح ..بجد ياريت كل بنت تقتنع بان الفرحة مش بالرقص والأغانى والفستان اللى بالآلاف ..الفرحة شىء لازم ينبع من جوانا ..لازم نغير تفكيرنا ونبعد عن التقاليد اللى بتقيدنا ..يارب الناس كلها تفرح
• بدأت مغامراتى المطبخية ..بعض التجارب ناجحة والباقى مش ولا بد ..بقيت مشاهده بانتظام لقناة فتافيت لعل وعسى مهاراتى تتحسن شوية ..تنصحونى بإيه يا بنات؟؟
• أفكارى مش مترابطة وكلامى مفيهوش جديد لكن كتبت لأنى نفسى أكتب..خايفه أفقد القدرة على الكتابة فتحملونى ولكم الأجر والثواب