وداعا أيها الحزن

إقامتى فى المدينة عاملة زى الحلم الجميل اللى خايفة أصحى منه ..كل ما أدخل ساحة الحرم ابص حواليا وأنا مش مصدقة انى أنا هنا ..كفاية انى أدخل وأقعد تحت أى عمود وأنسى الدنيا ..بحب كل حاجة فيه ..الرخام الأبيض اللى بيشع برودة ..السجاد الأحمر ...السقف والعواميد..حلقة القرآن وصحبتها الجميلة..زميلاتى من سوريا، السودان، فلسطين، السعودية، الجزائر وطبعا مصر..كل واحدة بشخصيتها وعاداتها ولهجتها الجميلة ووقت لما نقرى القرآن كل اللهجات تنتهى ونتكلم كلنا بلغة واحدة... أصوات أئمة الحرم واللى بتخليك بتستمتع بالقرآن... المدينة فيها راحة نفسية عجيبة..مهما قابلتنى من مشاكل فاحساسى انى لسه هنا بيهون كل المشاكل ..أنا هنا مش فى غربة ..أنا هنا فى جنة الأرض...والحاجة الوحيدة اللى بتنكد عليا احساسى انى ممكن اسيب المدينة فى يوم من الايام..اعتقد انه هيبقى يوم صعب جداا وبتمنى انه ميجيش..اللهم اجعل لى فى المدينة مقاما ورزقا حلالا واختم لى فيها بالصالحات

---------------
وقفت أصلى العشاء وعلى يمينى سيدة تركية والأتراك من الشعوب المنظمة اللى بتلاقيها دايما فى جماعة ..حتى زيهم متقارب ودايما باللون البيج أو الرمادى سواء كانوا رجال أم سيدات..بيحاولوا يكلموك برغم انك مش هتفهم حاجة لكن بيستمروا ومن ابتساماتهم واشارتهم تحس بسعادتهم وودهم..السيدة اللى على يمينى كانت بتكلمنى ومن اشاراتها فهمت انها بتشاورلى انى اتقدم للمكان الفاضى فى الصف الامامى..رديت عليها وشاورت على الاخوات الايرانيات اللى وافقين..ضحكت لانها فهمت قصدى..اللى واقفين شيعة وتقدر تميزهم بسهولة جداا..ايه اللى خلانى مش عايزة أقف معاهم ..فيه بعضهم بيخالف الامام يعنى الامام يركع هما يسجدوا وبالتالى ممكن أتلخبط لكن السبب التانى هو حاجز نفسى مالوش سبب محدد ..لكن خلانى مش قادرة اصلى جنبهم
يا ترى أنا متعصبة؟؟ ..انا من اكتر الناس اللى بيقدروا الاختلافات بين البشر ولو وقفنى اى حد من الشيعة يسألنى عن اى حاجة بقف واكلمه من غير اى مشكلة ..بس هل يا ترى الموقف ده معناه ان الواحد ممكن يقول كلام وساعة التنفيذ ميقدرش يطبقه
مش عارفة الحقيقة..أنا مندهشة من نفسى

---------------
انا طبعا بدرس فى الجامعة..هنا بدرس فى كلية للبنات بس وبصراحة سعيدة جداا ان العمل مافيهوش اختلاط لدرجة انى حاسة انى بقيت اجتماعية اكتر..انا بطبيعتى هادية جداا وقليلة الكلام والاخوة المدونين اللى قابلونى فى الصيف لاحظوا كده..لكن هنا العمل مع النساء فقط اعطانى احساس بالحرية اكتر وحاسة انى بقيت بتكلم اكتر ..بس طبعا فيه عيوب ..الستات بيتكلموا اكتر وبيراقبوا بعض ..اللبس والحالة النفسية واخبارك ورحت فين ومين قال ومين مقلش
يعنى برضة تحس انهم على حريتهم
لكن متعة التدريس فى التعامل مع طالباتى.. التدريس خبرة متبادلة..يعنى انا بعلمهم وبتعلم منهم ..الحكايات معاهم كتير..لكن مرة كانت عندى طالبة راجعة من العمرة ولاقيتها بتقولى يا دكتورة انا اكتشفت فى العمرة دى اكتشاف خطير..اندهشت وقلتلها خير..قالتلى اكتشفت انى بحبك...طول ما انا فى الطواف والسعى وانتِ فى بالى..كلامها كان سحرى وساعتها معرفتش اقولها حاجة غير انى كمان بحبها ودى فعلا الحقيقة مع انها علطول بتتكلم فى المحاضرات واليوم اللى متتكلمش مع زميلتها بقلق عليها وبدل ما اسكتها..اقلها ايه انت مالك النهاردة ساكته يعنى؟؟
أما اختها فالجمعة اللى فاتت بعتتلى رسالة جميلة على الموبايل والجميل انى انهيت الكورس اللى بتاخده معايا فى الترم اللى فات ..يعنى مش عايزة منى حاجة ومافيش اى مصلحة للمصلحة
إذا لم تطب فى طيبة عند طيب به طابت الدنيا فأين تطيب؟
وإن لم يجب ربى الدعاء بأرضها ففى أى أرض للدعاء يجيب؟
يا ساكنى أكناف طيبة كلكم للقلب من أجل الحبيب حبيب
أهل المدينة طيبين قوى بجد

---------------------------

من مقدمة رواية "لا شىء يهم " لمحمد الغزالى

لماذا نكتب ؟

نكتب

لأننا كل يوم نشعر أن جدار الظلام يزحف علينا من كل ناحية

يحاول أن يعمي بصيرتنا كما نجح مع آخرين

نكتب لكي نثقب في جدار الظلام هذا ثقبا يمر النور منه للأجيال

نور … يروي ظمأ الباحثين عن الحق وعن الطريق القويم وعن الحياة الأفضل

نور ...يجدد قلوبنا بحق لتصير قلوبنا الأنانية والمتعصبة والشريرة… قلوب ترحم وتغفر وتحب الجميع ...

نور أنار أذهاننا بحق فصرنا لا نـُخدع ولا نـُغيب ولا نـُضلل بتقوى خارجية … أو بكلام جميل تحت اسم الله

هذا الكلام اهديه لكل من يكتب بصدق ولكنه اهداء خاص

إلى عُمر صاحب المدونة التى تحمل اسمه والتى قام بحذفها من فترة ليست بعيدة

فى اخر بوست كتب تعليقات زواره التى أثرت فيه واليوم أقول له أن التأثير كان متبادل

كلماتك كانت نورا أضاء للأخرين الطريق

وأنت تبدأ عام جديد من حياتك اتمنى لك كل خير واتمنى أن يكون العام القادم عاما تودع فيه الأحزان

يا عُمر " ولسوف يعطيك ربك فترضى"

-----------------------------------

شكر خاص لمحمد الغزالى لانه سمحلى باقتباس كلماته ..الف مبرووك يا محمد نجاح مجموعتك القصصية "ساديزم" وعقبال المجموعة التانية باذن الله