عسكر و حراميه و غلابه

قبل البوست
كل عام وأنتم جميعا بخير اليوم هو الثانى من شهر رجب 1429 ھ ....كل عام وأنتم الى الله أقرب... اللهم بلغنا جميعا رمضان وأعنا على صيامه وقيامه

---------------------------

واحنا صغيريين بنلعب عسكر و حراميه كنا عارفين ان العسكر لازم يمسكوا الحراميه بس مع عالم القطب الأوحد و الفوضى الخلاقه و الكلام الكبير اللى اخترعوه علشان ينهبوا العالم بقت اللعبه حاميها حراميها وبقينا عسكر و حراميه و غلابه و ناس شرفا بيصرخوا امسك حرامى بس لا حد سامع ولا حد عايز يسمع.

و عليك يا صاحبى تعرف انت مين فيهم لو كنت من الغلابه زى حلاتى فأبشر و بشر الصابرين هما فكرينا صابرين صبر العاجزين و أنا و انت بس اللى عارفين إن احنا صابرين الصبر الجميل صبر المؤمنين. بصلهم و اضحك عليهم على غفلتهم و طول أملهم أصلهم يا صاحبى ما بيقروش التاريخ و لا كتب الدين....اسمع حكاياتهم و ابتسم.... جابوا البوفيه على طياره من مكسيم فى باريس و الورد من امستردام...... و هربوا فلوسهم لبنوك سويسرا و جزر الكيمان.... خليهم يصيفوا فى نيس و يشتوا على سفوح الألب يتزحلقوا ع الجليد....خليهم يلبسوا أغلي الماركات و يركبوا أحلى العربيات....بصلهم و اضحك من قلبك و متنساش سلاحك اللى لا يمكن يخيب... دعا فى التلت الأخير من الليل ربنا يورينى فيهم يوم و أعيش و أشوفهم ورا أسوار السجون...يا رب دخلنى الجنه من غير حساب دول ورونى فى الدنيا كل أصناف العذاب...يا رب خلينى صابر الصبر الجميل....
ادعى يا صاحبى و متنساش معادنا يوم الدين عند قنطره المظالم هتاخد حقك من كل مفترى و حرامى وظالم و يومها هنشوف صحيح من فينا الضعيف المسكين خليهم يفتكروك عاجز غلبان و أنا و انت بس اللى عارفين و متنساش معادنا يوم الدين عند العادل اللى لا بيغفل و لا بينام.

----------------------------------------

إهداء
إلى من نرى فى عيونهم نظرات العجز و القهر والإنكسار
إلى البسطاء الشرفاء الكادحين الذين يتضورون جوعا ولا يأكلون حراما
إلى الذين ليس لهم حيلة إلا الدعاء وانتظار الفرج
إلى الذين يوقنون بأن ما عند الله هو خير وأبقى
إليهم جميعا ...
لا تحزنوا فإن المسكين حقا هو من لا يقدركم حق قدركم
المسكين حقا هو من لا يتقى دعوتكم التى ليس بينها وبين الله حجاب ولا يعرف أنه عز وجل أقسم بعزته وجلاله لينصرنكم ولو بعد حين
المسكين حقا هو من لا يعرف انه لا بد من يوم معلوم تترد فيه المظالم أبيض على كل مظلوم أسود على كل ظالم