شوفى يا جارتى

كتاب جون جراى (رجال من المريخ ونساء من الزهرة) حقق اعلى مبيعات لانه بيشرح الفرق بين الرجل و المرأة و ازاى كل واحد فيهم بيفكر بطريقة مختلفة، قرأت اجزاء من الكتاب فى محاولة يائسة لفهم المعضلة الاساسية و اللى مر 37 سنة من عمرى و أنا لسه مش فهماها هما الرجالة زينا كده و لا هما صحيح من كوكب تانى وازاى بيفكروا و ليه ساعات بفهم التشريح و الباطنة و الجراحة ولما اجى للرجالة احس انى مش فاهمة حاجة؟...ايه الاختلاف؟

الكتاب بيقول ان الراجل لما بيكون عنده مشكله بيدخل كهفه و ما بيحبش يتكلم عنها لغاية ما يوصل للحل اما احنا فبنحب نحكى و نتكلم فى المشكلة و نقلبها يمين و شمال بس مش لوحدنا طبعا... مع ام و لا خالة ولا أخت...صديقة و لا جارة ولا فى مدونة ع الانترنت المهم ان الكلام عن المشكلة عندنا هو جزء من الحل لانه نوع من العلاج النفسى اصل المشاكل عاملة زى الهوا اللى بيملا البالونة اللى جوانا و لو ما فرغنهاش باستمرار هتتمددد وتتمددد لغاية مانطق و يمكن نروح فيها.
ولما دخلت عالم المدونات لاحظت ان معظم المدونين من العنصر النسائى على اختلاف اتجهاتهم و افكارهم واللى بيجمعهم هو الرغبة فى الفضفضة و التعبير عن الذات...ليه احنا اكتر..يمكن لاننا بنحب نتكلم اكترمن الرجالة.... يمكن مشاكلنا اكتر و لا يمكن احنا حساسين اكتر و بنعمل من الحبة قبة اما الرجالة فأعصابهم فى تلاجة و ماتش كورة واحد بيفرغ كل الشحنات اللى جواهم....و لا يمكن لاننا محتاجين نتكلم مع ناس ميعرفوش عنا الا اللى احنا نسمحلهم يعرفوه علشان نهرب من الادانة اللى بتلاحقنا على كل المستويات...لو كنت جميلة ولا عادية...سمينة ولا نحيفة...متعلمة ولا جاهلة...مثقفة ولا مش فى دماغك...بتشتغلى ولا ربة بيت....لو كنت زوجة و لا مطلقة ولا عانس .....عندك اولاد ولا ربنا ما ارادش عندك بنات ولا ولاد ....فى كل الأحوال احنا مدانين.

وبعد التفكير قررت انى اعمل مدونة ليه ولجاراتى نتكلم فيها عن مشاكلنا وهمومنا و نفكر مع بعض بصوت عالى و نحاول نساند بعض بقدر الامكان و حلمى انها تبقى مكان لكل واحدة عندها فكرة و لا مشكلة عايزة تشاركنا فيها و تبقى مكان يجمعنا اولا على الحب فى الله وثانيا الكلام من غير خوف ولا قلق و ثالثا على مبدأ مهم وهو الاخلاص فى النصيحة.... هستنى اقترحاتكم و آرائكم عايزيين نناقش ايه فى المدونة و ايه اقترحاتكم علشان تبقى احسن و تحس كل واحدة فينا انها فى بيت جارتها معزومة على كوباية شاى و بتحكى زى ما هى عايزة...ايه رأيكم يا بنات...تفتكروا نسمح للرجالة بالتعليق لان فى موضوعات آرائهم فيها هتكون مهمة و هنعرف منهم هما عايزين ايه من الغلابة اللى هما احنا و لا بناقص؟ ... ايه رأيكم؟؟؟؟